සුසන්තිකාත් රට හැරයන ලකුණු..!
ඔලිම්පික් පදක්කම්ලාභී සුසන්තිකා ජයසිංහ සිය දරුවන් දෙදෙනා සමඟ ඕස්ට්‍රේලියානු පුරවැසිභාවය ලබා ගැනීමට සූදානම් බව වාර්තා වනවා.
මීට මාස දෙකකට පමණ පෙර ශ්‍රී ලංකාවෙන් පිටව ගොස් ඇති ඇය, යළි මෙරටට පැමිණීම අවිනිශ්චිත බව වාර්තා වන අතර ඇයගේ දරුවන්ගේ අධ්‍යාපනයට සහ අනාගතයට මුල්තැන දීම, ඔස්ට්‍රේලියාවට මෙල්බර්න් නුවරට සංක්‍රමණය වීමේ අරමුණ බවයි පැවසෙන්නේ.
සුසන්තිකාගේ සමකාලීන මලල ක්‍රීඩිකාව, ආසියානු පදක්කම්ලාභී සහ ඔලිම්පික් ක්‍රීඩිකා දමයන්ති දර්ශා ද මීට වසර කිහිපයකට පෙර සිය පවුල සමඟ ඕස්ට්‍රේලියාවට සංක්‍රමණය වුණා.
මේ වන විට 49 හැවිරිදි වියේ පසුවන සුසන්තිකා ජයසිංහ 2000 වසරේ සිඩ්නි ඔලිම්පික් උළෙලේ දී මීටර් 200 ඉසව්වේ රිදී පදක්කම දිනාගත් අතර, ඩන්කන් වයිට්ගෙන් පසු ඔලිම්පික් පදක්කමක් දිනූ දෙවන ශ්‍රී ලාංකිකයා සහ ස්ප්‍රින්ට් ඉසව්වකින් ඔලිම්පික් හෝ ලෝක ශූරතා පදක්කමක් දිනූ පළමු ආසියානු කාන්තාවයි.
ඇය කෙටි දුර ධාවන ඉසව්වලින් ඔලිම්පික් පදක්කමකට හිමිකම් කී එකම ආසියානු ක්‍රීඩිකාව වන අතර ලෝක මලල ක්‍රීඩා ශූරතාවලියේදී පදක්කමක් දිනූ පළමු සහ එකම ශ්‍රී ලාංකිකයා ද වනවා.
සුසන්තිකා 1996, 2000 සහ 2008 දී අවස්ථා තුනකදී ඔලිම්පික් සඳහා ශ්‍රී ලංකාව නියෝජනය කළ අතර ඇයව හැඳින් වූයේ ආසියාවේ කළු වෙළෙඹ යන ආදරණීය නාමයෙන්.
අනෙකුත් රටවල් වල විශේශයෙන් බටහිර සහ දියුණු රටවල මෙවැනි රටට කීර්තියක් අත්කර දුන් ක්‍රීඩක ක්‍රීඩිකාවන් සඳහා ඔවුන් ක්‍රීඩාවෙන් සමුගත් විට ඔවුන්ගේ අත්දැකීම් ඉදිරි පරම්පරාවල ක්‍රීඩක ක්‍රීඩිකාවන්ට අත්කරදීමට විශේශ වැඩපිළිවෙලවල් ඇතිමුත් ඔවුන් දේශපාලන බල අධිකාරයට සහ නිලධාරිවාදයට දණ නොනමන්නේනම් ශ්‍රී ලංකාව වැනි රටවලදී එවන් සුවිශේශ ක්‍රීඩක ක්‍රීඩිකාවනට අත්වන ඉරණම ඛේදවාචකයක් බවද මෙහිදී මතක් කරදිය යුතුය.
above image source_https://www.srilankasports.com/wp-content/uploads/2021/09/susanthika-678×381.jpg
Lanka Power News.
