ගුරුපඩි ගන්න මදාවියෝ..!

බොහෝ පාසැල්වල පොල්ලක් හෝ   ලොකු කෝටුවක් අතේ  අරං පංතිවලට, රැස්වීම් වලට යන පිරිමියෙක් දෙන්නෙක් ඉන්නවා. එහෙන ගැහැණුත් නැතිව නෙවෙයි. පාසැල්වල කිසිම ගුරුවරයෙකුට හෝ ගුරුවරියකට වේවැල් කෝටු, පොලු තියාගැනීම සපුරා තහනම්. මේ රටේ ශාරීරික දඬුවම් නීති මගින්ම සම්පූර්නයෙන්ම තහනම් කරලා තියෙන්නේ. ගුරුවරු ඒ ගැන දැනුවත්වීම වැදගත්.

නමුත් මෝඩ දෙමව්පියන් ඉන්නවා පාසැලට ඇවිල්ලා “ඕකට ගහල හරි කමක් නෑ…හදල දෙන්න” කියලා කියන. සමහරු කියනවා, “අපි මෙහෙම ඉන්නෙ, ගුරුවරු ගෙන් හොඳට ගුටිකාලා හැඳුණු නිසා” කියලා. ඒ අම්මලා තාත්තලා කියන “මෙහෙම ඉන්නෙ” කොහොමද කියලා අපි දන්නෙ නැහැ. නමුත් මේ රටේ බහුතරයක් හොඳින් ඉන්නේ පාසැලෙන් ගුටිකාලත් නෙවෙයි. ගෙදරදි ගුටි කාලත් නෙවෙයි. ගරා වැටෙන, පිරිහෙන අපේ විධිමත් අධ්‍යාපනයෙන් හැකිපමණ මහන්සිවෙලා ඉගෙනගෙන.

නමුත් කියන්න ඕනෙ, පාසැල්වල පොල්ලක් ඇරං, ලොකු කෝට්ටක් ඇරං මෙහෙම පංති වලට, රැස්වීම් වලට යන අයත් ගුරුවරු කියල කියාගන්නවා. ඔවුන්ට ගුරු පත්වීම් දීලා පඩිත් ගෙවනවාලු. ඒ ගැන ගුරු සංගම් නායකයෝ කථා කරන්නෙත් නෑ. ඒ නිසා ළමුන්ට එහෙම ගහන එකත් නිළ කාර්‍යයක් කියලයි හැමෝම වගේ හිතන්නේ.

පාසැල්වල “ගුරුවරු” ඉන්නවානම් මේවාගැන ගුරුමංඩල රැස්වීම් වල කථා කලයුතුයි.

කුසල් පෙරේරා.

ලංකාව තුල පවතින ය්ම් පසුගාමී සමාජ තත්වයන්ද මේ ගුරුවරුන්ගේ පරපීඩක මනෝභාවයට ඉවහල්වන බව අපිට හඳුනාගත හැක. එසේම මෙසේ දරුවන්ට දඬුවම් දීමෙන් සමහර ගුරුවරු ලබන සතුට ගැනද මෙහිදී අවධානය යොමුකල යුතුය. අනෙත් අතට මෙසේ දරුවන්ට අමානුෂීක දඬුවම් ලබාදෙන්නේ ඔවුන් හොඳමගට ගැනීමට යැයි පවතින අතිශය වැරදි සහගත වූත්, යම් ආගමික පසුබිමක පවතින්නාවූත් අදහස් පද්ධතියක මිශ්‍රණයකින් මතවාදය බොහෝවිට අප සමාජය වෙලාගෙන තිබීමද කණගාටුවට කරුණකි. ඇත්තටම කුසල් පෙරේරා මතුකරන මෙම අතිශය වැඳගත් කාරණය සඳහා සමාජයේ යම් සංවාදයක් ඇතිවීම ඉතාම වැඳගත් බවද කිවයුතුය.

මක්නිසාදයත් පාසැල් දරුපරපුර යනු අනාගතය භාරගැනීමට සිටින පරපුර බැවින් ඔවුන්ගේ පෞරුෂය මෙසේ පොලු මුගුරු වලින් සහ වේවැල් කෝටු වලින් අමානුශික දඬුවම් දීමෙන් මොට කිරීමට ගුරුවරු නාමයෙන් පෙනී සිටින මදාවියන්හට ඉඩදී බලාසිටීමට දෙමව්පියන්හට පුලුවන් කමක් නැත.

LPN ADMIN.